全額資助六週藝術治療（只限成人）

透過六週藝術治療共同探索移英路上身份轉變、回憶、適應及歸屬感

我哋同 The Holding Palette CIC 合辦嘅藝術心理健康工作坊即將進入第二階段。

藝術心理治療師 Jasmine 設計咗一個名為 「河流與蛻變」 嘅移英生活藝術心理健康工作坊。無論你正處於移英生活嘅探索期、適應期，定係沉澱期，我哋都想為你提供一個無壓力嘅藝術陪伴空間。

今次工作坊會以「河流」作為主題，透過簡單而有結構嘅藝術創作，陪伴大家慢慢探索移英路上嘅轉變、身份、記憶、適應同歸屬感。

你唔需要有任何藝術經驗，亦唔需要「識畫畫」。呢個工作坊重視嘅唔係作品好唔好睇，而係創作過程中你可以慢慢停低、感受、整理同表達自己。

參加者可以期待：

• 一個安全、溫和、無批判嘅創作空間
• 透過顏色、圖像、文字、物件同黏土去表達難以用說話講清楚嘅感受
• 以「河流」作為比喻，探索自己喺移英生活中經歷嘅轉變同流動
• 製作屬於自己嘅黏土「小船」，象徵喺轉變中承載、支持同前行嘅力量
• 同其他參加者一齊經歷一段有陪伴感嘅藝術旅程

呢個唔係美術班，亦無需分享個人經歷，你可以用自己舒服嘅方式參與，安靜創作、慢慢觀察，或者喺合適嘅時候分享。

「河流與蛻變」 希望成為一個讓香港人喺英國生活中，有空間停一停、望一望自己、整理內在經驗，並重新連結自己同身邊人嘅地方。