2025 թվականի մայիսի 7-ին՝ ժամը 18:30-ին, Գաֆէսճեան արվեստի կենտրոնի «Հանդիպում արվեստի հետ» շարքի շրջանակում «Խանջյան» սրահում կկայանա հայ ճարտարապետ, ակադեմիկոս, Երևանի գլխավոր ճարտարապետ (1971-1981), Կասկադ համալիրի ճարտարապետական նախագծի համահեղինակ Ջիմ Թորոսյանի մասին ծավալուն մենագրության շնորհանդեսը՝ «Архитектор Джим Торосян: Maestro di bellezza» («Ճարտարապետ Ջիմ Թորոսյան. Maestro di bellezza»):
Գրքի հեղինակ՝ Կարեն Բալյան
Հրատարակիչ՝ TATLIN հրատարակչություն
Ջիմ Թորոսյանը իր սերնդի ամենատաղանդավոր և խոստումնալից ճարտարապետներից մեկն էր։ Մնալով հավատարիմ համաշխարհային ճարտարապետական ժառանգության վրա հիմնված իր մոտեցումներին՝ նա իր աշխատանքներում համատեղում էր ազգային ձևերը ժամանակի հիմնական ուղղության՝ մոդեռնիզմի հետ։
Գիրքը փորձ է ոչ այնքան նկարագրելու, որքան Ջիմ Թորոսյանի աշխատանքը հասկանալու և Վարպետի հիշատակը հավերժացնելու։ Ճարտարապետի կյանքի տարիների միջով անցնելով՝ հեղինակ Կարեն Բալյանը վերլուծում է նրա ստեղծագործական աշխարհայացքը, մասնագիտության նկատմամբ մոտեցումը և յուրօրինակ ճարտարապետական ոճը՝ ընկղմվելով Թորոսյանի ճարտարապետության զարմանահրաշ աշխարհի մեջ։
Շնորհանդեսի մուտքը միայն նախնական գրանցմամբ՝ հետևյալ հղումով։
